Orange - Directed By - RGV - Posani - Shekar Kammula - B.Gopal

Orange - Directed By - RGV - Posani - Shekar Kammula - B.Gopal

http://www.youtube.com/watch?v=_We9QIIICzQ&feature=player_embedded#!

21 రోజుల YSR మాలట!! విగ్రహం కూలినా సంకల్పం చెదరదట..

వార్తల్లో చాలా మంది చూసే ఉంటారు. మనసు లో అభిమానం, ఆత్మీయత వ్యక్తపరచటానికి పాపం గాజువాక లో ఒక వై యెస్ గారి యువజన అభిమానులు అన్నిటికన్నా ఎత్తైన 60 అడుగుల విగ్రహం ప్రతిష్టించాలన్న సంకల్పంట. బెంగాల్ నుండి 11 మంది కళాకారులని తెప్పించారు.. 3 నెలలుగా కష్టపడుతున్నారు.

హ్మ్మ్ బానే ఉంది. తర్వాత పార్టే.. కాస్త "డిఫరెంట్' గా అనిపిస్తుంది సెప్టెంబర్ రెండున దాన్ని ఆవిష్కరించి 21 రోజుల వై యెస్ మాల వేసుకోవటం ఏమిటో, కొబ్బరికాయలు కొట్టి, పూజలు నిష్టగా ఒక దేవుడికి చేసినట్టు చేసి.. నిమజ్జనం చేయటం, ఆ నిమజ్జనం తర్వాత మట్టి ని వెలికి తీసి ఇడుపుల పాయలో వెద జల్లటం..

వారి భక్తి పాపం అలా ఉండగా.. విగ్రహం కూలగానే మనస్తాపాన్ని తట్టుకోలేక ఆ ఆర్గనైజర్ రెండు సెల్ ఫోన్లూ స్విచ్ ఆఫ్ చేసి ఎక్కడికో వెళ్ళిపోయారుట.. తల్లి దండ్రులకి కూడా తెలియదట..

ఏంటో పాపం!

వివరాలకి

http://www.youtube.com/watch?v=gfEkMcz95Fc

మన నాయకులు , వారి పండగల/ఇతర సందర్భాల గెటప్ లూ

పూర్వం ఇఫ్తార్ విందుల్లాంటి పార్టీల్లో మన రాజకీయ నాయకులు ఏదో టోపీ పెట్టుకుని ముస్లింల సాంప్రదాయం ప్రకారం, ప్రార్థన చేసిన ఫొటోలు పేపర్లలో వచ్చేవి. అలాగే హిందువుల ఫంక్షన్లకి వచ్చే నాయకులు హిందూ సాంప్రదాయం ప్రకారం ముఖాన కుంకుమ తో కనిపించేవారు టీ వీ ల్లో. వీరంతా పెద్దగా సందర్భానుసారం మేకప్ అవీ చేసుకునే పద్ధతి అవీ లేవు.

అన్నగారు ఎంతైనా కాస్త గ్లామర్ తెచ్చి వివేకానంద గెటప్, వ్యవసాయదారుని గెటప్, ముస్లిం ల షేర్వానీ గెటప్ లాంటివి వేసి రాజకీయాలకి గ్లామర్ టచ్ ఇచ్చి ప్రజల్ని డైలాగులతో రంజింపచేసారు కదా..

ఆయన వెళ్ళిపోయాక మళ్ళీ గ్లామర్ ఎలక్షన్లకి మాత్రమే పరిమితి అయ్యిందేమో..
మళ్ళీ దాన్ని నెక్స్ట్ లెవెల్ కి తీసుకెళ్ళాల్సిన బాధ్యత 'మార్పు ' అన్న నినాదం తో వచ్చిన మెగా స్టార్ తన భుజస్కంధాల మీద వేసుకున్నారు కదా.. ఆయన ఇచ్చిన ఇఫ్తార్ విందు లో మరీ అరబ్ షేక్ అవతారమెత్తి కళ్ళకి సుర్మా దగ్గర్నించీ అతి జాగ్రత్త గా అత్యంత సహజం గా కనిపించేలా తగు జాగ్రత్తలు తీసుకుని.. ప్రేక్షక లోకానికి.. సారీ సారీ ప్రజానీకానికి కనువిందు కలిగిస్తే..

మన రోశయ్య గారు నేనూ తక్కువతినలేదని..చూడండి ఎంత చక్కగా గెటప్ మార్చి మేకప్ చేసుకున్నారో ఒక పుస్తకావిష్కారానికి :-)

పిల్లల న్యూస్ లో పెళ్ళిళ్ళూ, గృహ హింస, బిపాషా, రణబీర్ వార్తలు!!

టైంస్ ఆఫ్ ఇండియా వారి స్టూడెంట్స్ ఎడిషన్ చూసి తీరాలి. మా అపార్ట్ మెంట్ లో పాప చేతిలో చూశాను. వాళ్ళ స్కూల్ లో బలవంతం గా అందరిదగ్గర నుంచీ సంవత్సరానికి చందా కట్టించుకున్నారట.
ఏం ఉంటుందో చూద్దాం అని సరదాగా అడిగి తీసుకున్నాను.

మొదటి పేజీ..
ఎడమ పక్క అమీర్ ఖాన్ 8 నెలల నుండీ సినిమాలు చేయట్లేదని కుడి పక్క రాహుల్ మహాజన్ పెళ్ళాన్ని కొట్టాడని వాళ్ళావిడ ఫొటో..
సగం పేజీలో క్లింటన్ల పాప చెల్సియా పెళ్ళి విశేషాలు..కింద పావు పేజీ లో ధోనీ దంపతులు తాజ్ సముద్ర కి వెళ్తే.. అక్కడ వాళ్ళావిడ షెఫ్ ని అడిగి ఆవిడే వండిందిట ఆ వార్త.

రెండవ పేజీ:కింద సగం పేపర్ రాహుల్-డింపి దంపతుల తగాదా, మళ్ళీ కలిసిపోవటం.., చెల్సియా పెళ్ళి విశేషాలు.
మూడవ పేజీ వదిలేస్తే..నాలుగవ పేజీ పూర్తిగా చెల్సియా పెళ్ళి ఫొటోలు, పెళ్ళి గౌను, ఎక్కడ ఎంత ఖర్చు పెట్టారో.. పూర్తిగా డెడికేట్ చేశారు!

ఆఖరి పేజీ లో పావు భాగం..బిపాషా కారీర్ లో పదేళ్ళ పూర్తి, రణబీర్ గిటార్ వాయించటం గురించి, కాజోల్ మళ్ళీ భర్తతో ప్రేమలో పడిందిట

మిగిలిన పేజీలు ఓకే..
ఇవీ ఐదవ తరగతి చదివే పాప కి స్కూల్ వాళ్ళు కొనిపించి ఇచ్చిన దినపత్రిక లో విశేషాలు..

మాజీ ప్రధాని పై ఇంత నిర్లక్ష్యమా?

ఈ టైటిల్ తో ఒక వార్త ఈనాడు పత్రిక లో వచ్చింది ఈరోజు.

మాజీ ప్రధాని పీ వీ నరసిం హారావు 90 వ జయంతి ని కాంగ్రెస్ నేతలు ఎవరూ పట్టించుకోకపోవడం శోచనీయమని ధ్వజమెత్తారట బ్రాహ్మణ సేవా సంఘ సమాఖ్య అధ్యక్షుడు.. ఆయన జయంతి లో కాంగ్రెస్ ఎం ఎల్ యే లూ, ఎం పీ లూ ఎవరూ పాల్గొనక పోవటం దురదృష్టకరమని ఆయన పేర్కొన్నారు.

అంటే.. మాజీ/ప్రస్థుత ప్రధాని,అధ్యక్షుల జయంతి ఉత్సవాలు ప్రతి యేటా ఎం ఎల్ యేలూ, ఎం పీ లూ జరపాలా?
దాదాపు ముప్ఫై మంది పుట్టినరోజులు జరుపుతూ ఉంటే ఇంక వేరే పనులేం చేస్తారు?
వారి సంగతి వదిలేస్తే..

మొన్నీ మధ్య రాహుల్ గాంధీ పుట్టినరోజు జరుపుకున్నారు కాంగ్రెస్ పార్టీ కార్యకర్తలు... కానీ ముఖ్యమంత్రి రోశయ్య గారు కూడా రాహుల్ ఫొటో కి కేక్ తినిపించటం కాస్త ఎబ్బెట్టు గా అనిపించలేదూ?

చందమామ పువ్వులనెప్పుడైనా చూశారా?

ఎవరో నాకీ విత్తనాలిస్తే ఏవోలే అని వేశాను. నెల తర్వాత.. ప్రతిరోజూ ఒక అద్భుతం నా ఫ్రంట్ యార్డ్ లో..

సాయంత్రం 4.30-5.00 గంటల మధ్య చందమామ పలకరించగానే విరిసి, తెల్లవారేసమయానికి ముడుచుకునే పూలివి...

నెలరాజునలరించటానికే వీటి జన్మ, ఆయన కి వీడ్కోలు చెప్పే ముందే ఎడబాటుని తట్టుకోలేము, అన్నట్టు ముందు గానే నిష్క్రమిస్తాయి..

కలువ పూల మొగ్గ లా ఒక మెగా సైజ్ సన్నజాజి లా సుకుమారం గా ఉంటాయి మొగ్గలు. మనం దాని వైపు చూస్తూ ఉండగానే.. 'ఠప్ప్ ' మని అరచేతి పరిమాణం లో విచ్చుకుంటాయి. ఈ విన్యాసం జరగేది జస్ట్ .. అర సెకన్ వ్యవథి లో.. తెల్లవారాక దాని అవశేషం తప్ప ఏదీ ఉండదు చూట్టానికి..

అజ్ఞాత, శరత్ 'కాలం', మాలిక నిర్వాహకులు ఏకలింగం గారూ,

అజ్ఞాత,
తెలుగు బ్లాగు మొదలు పెట్టిన 15 రోజులకే కామెంట్ మోడరేషన్ అవసరాన్ని అర్థమయేలా.. కామెంట్లు విడిచినందుకు!

శరత్ 'కాలం' గారికి,
మీ టపా చూసిన తర్వాతే నా బ్లాగ్ కామెంట్లు చూశాను. వెంటనే పోస్ట్ తొలగించాను.. కామెంట్ మోడరేషన్ ఎనేబుల్ చేసి మళ్ళీ ప్రచురించాను.
మీ టపా కీ, టపా లో చూపించన సపోర్ట్ కీ కృతజ్ఞతలు.

మాలిక నిర్వాహకులకి,
ప్రత్యేక ధన్యవాదాలు! కామెంట్లు తొలగించినందుకు!

అత్తాకోడళ్ళ సంవాదం..

మా ఫ్రెండ్ అత్తగారు అమెరికా కెళ్ళింది. ఇద్దరు కొడుకులిళ్ళల్లో ఇంచుమించు గా ఒకే పరిస్థితి. భార్యా భర్తలు అన్నీ కలిసే పని చేసుకుంటున్నారు. ఆవిడ కి కాస్త బాధనిపించింది. పాత కాలం ఆవిడ కదా..

ఆవిడ తెలుగు టీచర్! వెరైటీగా ఆవిడ ఆక్రోశాన్ని వచన కవిత్వం గా ప్రకటించారు.

పాలలో మురిపాలు కలిపి,
కారం లో మమకారం వంపి,
అరిచేతులని పాదాల కింద నిలిపి
ఎంతో ప్రేమగ పెంచితి,

(కానీ..ఈరోజున)

కోడళ్ళకి టీలందించి,..
వంటలు వండి, బట్టలుతికి, (లాండ్రీ లో బట్టలు వేయటం అని ఆవిడ భావం)
ఆమెర(రి)కన సుఖపడుదరని పెండ్లి చేసి పంపితి..
తండ్రులారా, మీ కష్టం నే చూడజాల!
..

ఈ కవితలని తెలిసిన వాళ్ళకి చూపి, వాళ్ళ అభిప్రాయాలు తెలుసు కోవటం తో కోడలు పిల్లకి మండింది. అదేమని దెబ్బలాడితే.. చాతనైతే.. పద్యరూపం లో సమాధానం ఇవ్వమని చాలెంజ్ విసిరింది అత్తగారు. కోడలు తక్కువదా..ఆవిడా స్వీకరించి ఇలా రాసింది..

వచ్చితిమేమత్తింటికి పుట్టింటిని వీడి పెక్కు యాశలతోడన్..
తెచ్చితిమేమింట వెలుగు, మెచ్చుచు మా భర్తలు కడు డెందము మీరన్,
ముచ్చట పడి ఇంటిపనులు, మురిపముగ చేయబూన ముందుకు రాగా..
రచ్చన ప్రకటించి నీవు పరిహాసం చేయబూన తగునే యత్తా?

అత్తగారు ఎంతైనా టీచర్ కదా, కళ్ళజోడు పెట్టుకుని చందస్సు దిద్దటం మొదలు పెట్టేసారు వెంటనే... సెభాష్ కోడలా అంటూ

అల్లరి శ్రేయ కబుర్లు -2

అల్లరి శ్రేయ,వాళ్ళక్కా టీచర్, స్టూడెంట్ ఆట ఆడితే.. ఎప్పుడూ వాళ్ళక్కే టీచర్ అవుతుంది. దీనికేమో..అది ఆట లా కాకుండా స్కూల్ కెళ్ళినట్టుందని 'నేనాడను పో' అంది మొన్న. వాళ్ళక్క బెందిరించి,గొడవచేసి ఆడేలా ఒప్పించింది.

బెత్తం, అవీ పట్టుకుని ఇంకా రావేంటి.. అంటే 'నేనివ్వాళ్ళ ఆబ్సెంట్ అన్నమాట ' అంది..

**********************************************************************************
అది యూ యెస్ నుండి ఇండియా కి నెల రోజుల ట్రిప్ కి వెళ్ళి వచ్చింది. ' ఇండియా ఎలా ఉందమ్మా? ' అని అడిగింది వాళ్ళకి తెలిసినావిడ.

శ్రేయ అంది.. ' ఇండియాకీ, అమెరికాకీ ఒక తేడా ఉంది ' ..
అబ్బో అంత తేడా ఏంటబ్బా? అంటే చెప్పింది.. 'ఇండియా లో ఇంటి బయట డర్టీ గా ఉంటుంది, ఇంట్లో (నాయనమ్మ ఇంట్లో) నీట్ గా ఉంటుంది. అమెరికా లో ఇంట్లో డర్టీ గా ఉంటుంది..బయట నీట్ గా' వాళ్ళమ్మ ముఖాన కత్తి వేటుకి నెత్తురు లేదు..

**********************************************************************************
అల్లరి శ్రేయ,దానక్కా టీ వీ చూస్తున్నారు. శ్రీ కృష్ణుడు వేణువూదుతుంటే గోపికలు తన్మయత్వం తో తలలూపుతున్నారు. అక్క అంది నెమ్మదిగా ' వాళ్ళేంటి ఫూ.. అని వాయిస్తేనే ఇలా ఊగుతున్నారు? ' ఇది ఒక్క క్షణం కూడా ఆలోచించకుండానే.. 'ఆకాలం లో వాళ్ళకున్న మ్యూజిక్ లో అదే బెస్ట్ ' అనేసింది.

**********************************************************************************
ఓసారి అది శేషశాయి అయిన విష్ణుమూర్తి లక్ష్మీదేవి కాళ్ళు ఒత్తుతున్న పోస్టర్ తీక్షణం గా చూస్తోంది.. వాళ్ళమ్మ 'ఏంటమ్మా విష్ణుమూర్తి ని చూస్తున్నావ్? అని అడిగింది.

ఇది 'నేను బ్రహ్మని చూస్తున్నానమ్మా! ఆ లోటస్ లో కూర్చుని విష్ణుమూర్తి కదిలినప్పుడల్లా.. వీ ... వీ.. అని రోలర్ కోస్టర్ లా తిరుగుతాడేమో.. విష్ణుమూర్తి నుంచున్నా, నడుస్తున్నా!!! పడిపోతాడా? గ్లూ పెట్టారా అని ' అంది.

**********************************************************************************

శ్రేయ ఇంటికి చుట్టాలొచ్చారు. లాండ్రీ లోంచి బట్టలు తెచ్చింది వాళ్ళమ్మ పెద్ద జాలీ ట్రాలీలో. వంట చేస్తుంటే.. చుట్టాలావిడ ఊర్కే కూర్చుంటే ఏం బావుంటుందని.. బట్టలు మడత పెడదాం అని తీయబోయింది. ఇది ఆపి..
' డోంట్ బాదర్ అత్తా! మా అమ్మ ఎప్పుడూ మడత పెట్టదు. మాక్కావలసినవి.. ఈ చిల్లుల్లోంచి లాక్కుంటాం ఎప్పుడూ.. చుట్టాలొచ్చే ముందు మాత్రమే మడత పెడుతుంది.. మీరెళ్ళిపోతున్నారు గా ఈరోజు? ' అంది. వాళ్ళమ్మ తల పట్టుకుని కూర్చుంది.
**********************************************************************************

మరిన్ని తుంటరి శ్రేయ కబుర్లు ఇంకో టపాలో..

అల్లరి శ్రేయ కబుర్ల పాత టపా : http://rani-ratnaprabha.blogspot.com/2010/06/blog-post_11.html

మోరీలు కడిగే రాములూ - ముకేశ్ అంబానీ

ఈరోజు ఈనాడు ఆదివారం అనుబంధం లో నీతా అంబానీ (భారతదేశం లో అత్యంత సంపన్నులైన ముకేశ్ అంబానీ గారి భార్య) తో ఇంటర్వ్యూ లో ఆవిడ చెప్పిన విశేషాలు వింటే .. మా మోరీ రాములు భార్య జీవితం గుర్తొచ్చింది :-) రాములు మోరీలు కడుగుతాడు, సెప్టిక్ ట్యాంకులూ అవీ క్లీన్ చేయటం.. అవీ చేస్తాడు.

27 అంతస్థుల మేడలో ఆరు వందల నౌకర్లూ,చాకర్లూ, స్విమ్మింగ్ పూలూ, నాలుగంతస్థుల కార్ పార్కింగూ, కట్టించారట ముకేష్ అంబానీ గారు.

మా రాములు 700 రూపాయల అగ్గిపెట్టె లాంటి చిన్న అద్దింట్లో .. తల్లీ, ముగ్గురు పిల్లలూ, భార్యా కాక, తమ్ముడూ,మరదలూ,వాళ్ళ కొడుకూ కూడా ఉంటారు. అత్తగారూ కోడళ్ళూ తెగ అరుచుకుని, కొట్టుకుని,కొప్పులూడేలా తన్నుకుంటారు రోజూ.. మర్నాడు పేలు చూసుకుంటారు ఒకళ్ళకొకళ్ళు.

రాత్రి 10-11 గంటలకి ముకేశ్ ఇంటికొచ్చాక కలిసి తింటారట. భర్త గారు సజ్జ రొట్టే, ఉల్లికూరా.. నీతా గారు కూరముక్కలూ, పళ్ళూ,సూపులూ తప్ప అన్నం, చపాతీలూ ముట్టదట. 90 కిలోలనుండీ.. 47 కిలోలకి రావాలంటే ఈ త్యాగాలు తప్పవు కదా పాపం! కార్ లో మాత్రమే విరామం దొరుకుతుందిట. అప్పుడే ఆవిడ కునుకు తీస్తారుట.

రాములు కుటుంబం ఉదయం చద్దన్నం, తొక్కూ, ఉల్లిగడ్డా, ఏదుంటే అది.. మధ్యాహ్నం పని అయ్యాక నీళ్ళుంటే స్నానం చేసి మళ్ళీ అన్నమో రొట్టో, కారం తో.. తినగానే కంటినిండా నిద్రా.. సాయంత్రం మళ్ళీ చిల్లర పనులకోసం తిరగటం, ఎంత సంపాదన ఉంటే అంత, తినటమూ, తొంగోటమూ..

మాలతీ చందూర్ 'నన్ను అడగండి '

నా చిన్నప్పటినించీ మాలతీ చందూర్ గారి సమాధానాలు చూస్తూనే ఉన్నాను పత్రికల్లో. అప్పుడంతగా ఆలోచించలేదు ఆవిడ గురించి.. ఈ మధ్య మాత్రం స్వాతి పత్రిక లో ఆవిడ సమాధానాలు చాలా ప్రశ్నలకి అసలు పొంతన లేనట్టుగా ఉంటున్నాయి.


అదేదో కథ చెప్పినట్టుగా..

ఒకబ్బాయి ఆవు మీద వ్యాసం మాత్రమే నేర్చుకున్నాడట. పరీక్షలో తాజ్ మహల్ మీద రాయమన్నారట. అబ్బాయి మొదలు పెట్టాడట 'ఆగ్రా లో తాజ్ మహల్ ఉంటుంది. తాజ్ మహల్ పక్కన గడ్డి ఉండును.. ఆ గడ్డి లో ఆవు ఉండును. ఆ ఆవుకి రెండు కొమ్ములూ, తోకా....'

మచ్చుకి మీరే చూడండి.. (25.6.2010 స్వాతి వీక్లీ సంచిక లో పేజీ 56)

ప్రశ్న:

మన దేశం లో ఉన్నన్ని కులాలు, మతాలు మరే దేశం లోనైనా ఉన్నాయా?

సమాధానం :

ఎందుకుండవు? ఉంటాయి. సంపన్న దేశం అమెరికా లోనే ఉన్నాయి. 'మతం' అనే మాటని వ్యవస్థాజనితంగానూ, వ్యక్తిపరం గానూ వాడతారు. 'వాడి మతం వాడిది ' అంటే ఆ వ్యక్తి ఇష్టాయిష్టాకలి సంబంధించిన ప్రవర్తన.

ప్రవక్తలు సన్మార్గమే బోధిస్తారు. వ్యాఖ్యాతలు మాత్రం తమకి అనుకూలం గా మార్చుకుని, శిష్యప్రశిష్యులని తయారు చేసుకుని. స్థానబలిమిని కాపాడుకుంటారు. రాజ్యాంగ శాసనకర్తలు వెనకబడిన తరగతులకి పది శాతం రిజర్వేషనులను కల్పిస్తూ, మనది ఫెడరల్ వ్యవస్థ కాబట్టి రాష్ట్రాలకు ఆ విషయం లో స్వాతంత్ర్యమిచ్చారు.

సుప్రీం కోర్ట్ యాభై శాతం దాటకూడదని రూలింగ్ ఇచ్చేదాకా రిజర్వేషనుల సంతర్పణం చేశాయి. రాష్ట్ర ప్రభుత్వాలు. రెడ్లలో, బలిజలలో, నాయుళ్ళలోగల శాఖోపశాఖలు మనై ఆశ్చర్యపరుస్తాయి. ఇక బ్రాహ్మణులలో నియోగా, వైదీకా?, మధ్వులా? తిరుచూర్ణయా? విబుదా?, స్మార్తులా అని ముఖం మీదనే అడిగేవారట.

యేరవతల సంబంధం చేసుకోకూడదనే సంప్రదాయ సరళి గల సంఘం లో అనేకానేక కులాలు ఆవిర్భవించాయి. బ్రాహ్మణులు చేపలు తినటమేమిటని ముక్కు మీద వేలేసుకుంటారు. కాని బెంగాల్ లో వారికవి జలపుష్పాలు. ప్రస్తుతం మన దేశం లో మూడువేల కులాలు ఉన్నాయంటారు గణాంక లెక్కలు చెప్పేవారు.

మందార మకరంద మాధుర్యమున దేలు ..

మా ఇంటి మందారాల సొగసు చూడ తరమా? -- 18 రకాల మందారాలున్నాయి.. నా చిరు తోటలో.. 9 రకాల పరిచయం ఇక్కడ.. మిగిలినవి తదుపరి టపాలో!


శుక్రవారం పూట తలారా స్నానం చేసి తులసి కోట ముందు నూనూగు ఎండ కి జుట్టారబెట్టుకుంటున్న ఇల్లాలిలా ఈ మందారం..








ఎవరో కథ చెప్తుంటే.. గడ్డం కింద చేయి పెట్టుకుని వింటునట్టుగా లేదో .. ఈ పచ్చ మందారం?












మా అమ్మాయి పూల జడ లా ఎర్ర మందారాలు..










జీవితం లో అన్ని రకాల యెదురుదెబ్బలు తిని విజయం సాధించిన 60 యేళ్ళాయన హుందా తనం నింపుకున్న క్రీం మందారం..







ముప్ఫైల్లో పడ్డ ప్రౌఢ లా పూర్తిగా వికసించిన మరో మందారం!

చిచ్చుబుడ్డి వెలిగించగానే వచ్చిన చమక్కుల వాన లాంటి తెల్ల మందారాల చెట్టు..

పదహారేళ్ళ అమ్మాయి లా నాజూగ్గా, ముట్టుకుంటే కందిపోతుందేమో అన్నట్టు గా .. కాషాయం రేకు మందారం..

ఒద్దికగా మంగళ స్నానానికి కూర్చున్న పెళ్ళికూతురు లా ఉంది మా వంగపండు రంగు డబల్ మందారం కదూ? కాకపోతే.. పట్టు చీరలూ, నగలూ మిస్సింగ్!!

ఈ నారింజరంగు మందారం అర్థరూపాయ కాసంత బొట్టు పెట్టుకున్న అరవయ్యేళ్ళ పెద్ద ముత్తైదవ లా లేదూ ?

కింద రెక్క కాస్త గడ్డం లా వాలి.. ఈ గులాబీ రంగు మందారం మా వీధిలో ఉండే (పాన్ వేసుకున్న) అన్వర్ సాహెబ్ ని తలపిస్తుంది.

సింహాలూ,చిరుతలూ, యోధులూ, రాజులూ ...

ఆదివారం సాయంత్రం ఒక్క చానెల్ లోనూ సరైన కార్యక్రమం లేదని విసుక్కుంటూ తేజ టీ వీ పెడితే.. క్రికెట్ మాచ్ వస్తోంది. చూస్తే..మన సినీ తారల క్రికెట్ ట.. కాసేపు చూద్దామని కూర్చున్నాం. టీం లని పరీక్షిస్తే...

రాజు గారి పరివారం లో ఆయన గారి ఇద్దరు రాజకుమారులూ, నీలం రంగు యూనీఫాం వేసుకుని మేనల్లుళ్ళిద్దరు.. కలెక్షన్ల రాజు గారి ఇద్దరు కొమరులూ? నయనానందకరం గా అగుపించి.. కప్పు గెలిచారు. సంతోషం. అందరి విషయం పర్వాలేదు.. అఖిల్ గారే సినిమాలో నటించారబ్బా? ఈ మధ్య సరిగ్గా చూడట్లేదు.. నాకు తెలిసి ఆ అబ్బాయి ని 'బేబీస్ డే అవుట్ ' తెలుగు వర్షన్ లో చూసినట్టు గుర్తు.

ఓహో అలాగయితే ఆయనా సినీ తారే.. రాజుల పరివారం బానే ఉంది..

మెగా చీతాలల్లో మిగిలిన తారలు కనిపించలేదు.. గంగిగోవు పాలల్లా ఒక్క రామ చరణ చీతా ఉంటే చాలనుకున్నారేమో.. పవర్ తారలూ, స్టయిల్ తారలూ కనపడలేదు ఎక్కడా.

సిం హా గారొక టీం లో 'చరిత్ర రాసే' వంశం లోని సిం హం పిల్లలు ఇద్దరు ముగ్గురు వేరే టీముల్లో కనిపించారు. ఏదో ఒక టీం లో ఉంటే ఎవరో ఒకరైనా గెలుస్తారేమోననేమో.. పెద్ద సిం హం గారు మాత్రం తమ స్పోర్టివ్ స్పిరిట్ చూపించి.. వేరే టీం వాళ్ళతోనూ సంతోషాన్ని పంచుకున్నారు.

యోధులు రాజుల చేతిలో ఫైనల్స్ లో ఓడినా ఆట సరదాగా ఆడి ఆనందం పంచారు.

కొంతమంది ని గుర్తుపట్టలేకపోయాం ఎవరబ్బా అనుకుంటే.. మాచ్ కామెంటర్లు హీరోలూ/కామెడీ స్టార్ల తమ్ముళ్ళని పదే పదే గుర్తుచేసి.. 'ఓహో ' అనిపించారు.

నాకొక డవుటు.. హీరోయిన్లంటే.. గం నములుతూ, ప్రతి 2 నిమిషాలకీ, మొహమంతా పళ్ళు చేసుకుని 30 డిగ్రీలు ఊగుతూ నవ్వి.. పక్కనున్న ప్రామినెంట్ హీరోల మీదకి వాలిపోతూ, జుట్టుని వెనక్కి తోసుకుంటే .. దాన్నే గ్లామర్ అంటారా?

ఒక కారెక్టర్ ఆర్టిస్ట్.. రాజుగారి పక్కన కూర్చుని ప్రతి 4 కీ, 6 కీ లేచి డాన్స్ చేసి.. ఆరోజుకి ఇంక జింకెళ్ళే బాధ తప్పించుకుంది..

మధ్యలో సాం స్కృతిక కార్యక్రమాలు మాత్రం అదుర్స్! అలా అనగానే గుర్తొచ్చింది. కొత్త పెళ్ళికొడుకు సిం హం రాలేదెందుకో? పోకిరీ గారు ఎప్పుడూ దూరమేననుకోండి.

గతుక్కుమన్న క్షణాలు -1

కొన్నేళ్ళక్రితం మా అత్తయ్య ఒకావిడ ఇంటికెళ్ళాం.. మేము .. అన్నం పెడుతోంది ఆవిడ. మా మామయ్య ఆబ్సెంట్ మైండెడ్ ప్రొఫ్.. అందరికీ టేబుల్ మీద వడ్డిస్తోంది ఆవిడ. మా మామయ్య.. సడెన్ గా.. 'లక్ష్మీ.. ఏ కూరా అది.. తక్కువ చేసాను.. చుట్టాలకి మాత్రమే.. మీరు చూసి తినండీ అన్నావ్? ' అని అడిగారు. దెబ్బకి అందరూ .. గాన్.

ఓ సారి హాయిగా కాళ్ళు చాపుకుని సోఫాల్లో 20 పుస్తకాలు, పత్రికలూ, పేపర్లూ, చిప్స్ పాకెట్లూ, ఉతికిన బట్టలూ, ఆఫీస్ బాగులూ, లాప్ టాపులూ, కట్ చేస్తున్న కూరగాయలూ అన్నీ వేసుకుని టీ వీ చూస్తున్నాం..సెలవ పూట మా స్నేహితురాలి ఇంట్లో.. వాళ్ళ చెల్లి కి పెళ్ళికొడుకుని చూస్తున్నారు. పక్క అపార్ట్ మెంట్ లల్లోనే ఉంటారు ఆయన. మీ తో ఒక చిన్న పని ఉంది రావచ్చా? అని అడిగాడాయన ఫోన్ చేసి.. మా ఫ్రెండ్, నేనూ, యుద్ధ ప్రాతిపదిక మీద హాల్ అంతా క్లీన్ చేసే పని లో పడ్డాం. ఇప్పుడు టైం లేదు.. బెడ్ రూం లో కి తోసేద్దాం అంది తను. అంతే.. ఇంకేముంది అన్నీ విసిరేసాం. హాల్ మాత్రం హోటల్ రూం లా ఉంది. 'మేమెప్పుడూ ఇంతే.. టైప్ లుక్కు తో కూర్చున్నాం ' ఆయన వచ్చి నీళ్ళూ,అవీ ఇచ్చాక.. మీ ఇంటర్నెట్ వాడవచ్చా? అని అడిగాడు.. గతుక్కుమన్నాం. మరి ఇంటర్నెట్ కి రౌటర్ వాళ్ళ బెడ్ రూం లోనే ఉంది. ట్విన్ టవర్స్ శిథిలాల మధ్యనుండి నడిచినట్టు నడవాల్సి వచ్చింది మాకు .. ఆయనకి రౌటర్ నుండి వైర్ ఇవ్వటానికి.. :-(

ఒకసారి మా దూరపు చుట్టాలొచ్చారు ఇంటికి.. వాళ్ళమ్మాయి ఒడ్డూ,పొడుగూ ఇద్దరూ ఇంచు మించు ఒకే రకం గా ఉన్నారు. పిల్లలు ముందు నడుస్తుంటే.. పెద్దవాళ్ళు వెనగ్గా .. వస్తున్నారు. మా చెల్లి వంకరగా, డాన్స్ చేస్తూ, తింగరగా నడుస్తోందని మా అమ్మ రోడ్డని కూడా చూడకుండా.. ఒక్కటిచ్చింది.. వెనక నిండి.. 'ఏంటి ఈ వెకిలి నడక రోడ్ మీద? ' అని.. చూస్తే ఏముంది.. మా అమ్మ వేసింది చుట్టాలమ్మాయిని.

ఒక సారి ఇలాగే కొంచెం దూరం చుట్టాలు పిన్ని వరస.. వాళ్ళింటికెళ్ళాను. కాలేజ్ లో ఉన్నాను అప్పుడు. హాల్ లో ఫ్లూట్ పడి ఉంది. చూసి.. 'జన గణ మనా ట్రయ్ చేద్దామని వాయిస్తున్నాను.. మా పిన్ని లోపలనుండి..వాళ్ళబ్బాయనుకుని ' నీ వెధవ వాయింపుడు వినలేక ఉరేసుకోవాలనిపిస్తుంది.. ఆపరా చెత్త...' లాంటి పొగడ్తలతో మమ్మల్నలరించింది..


మరిన్ని విశేషాలతో మరో టపాలో..

డెట్ లెఫ్ గారి గర్వభంగం..

సాన్ హోసే లో నేను పని చేసేటప్పుడు మా బాసు డెట్ లెఫ్ గారు. ఆయన జెర్మన్.. ఆయన గారి గ్రూప్ లో తీరా చూస్తే.. అందరూ భారతీయులూ, చైనీయులూ. తెల్లగా ఆరున్నరడుగుల పొడుగూ, చూట్టానికి రిచర్డ్ గేరే లా ఉండేవాడు..

ఏదో ఒక విషయం లో నా భారతీయత అవమనింపబడేలా మాట్లాడుతూనే ఉండేవారాయన. చూసీ చూడనట్టు చాలా కాలం వదిలేసాము మేము.

మచ్చుకి.. లంచ్ టేబుల్ మీద ఇంటినుండి తెచ్చుకున్న తిండి తింటుంటే.. 'మాన్.. ఇట్ స్టింక్స్!' అనీ.. సల్వార్ కమీజ్లు వేసుకున్నప్పుడు.. 'Did you wake up today and thought.. I want to wear curtains today to work? Maan.. I would n't recommend that color to my enemies!!! ' అని.. కాఫె లో ఏదైనా కొనుక్కుంటే.. పైన.. మిరియప్పొడి, జల్లుకుంటుంటే.. 'ఆర్ యూ పెప్పర్ మానియాక్? ' అని..

సునామీ వచ్చినప్పుడు లక్షలాది మంది చనిపోవటం, నిరాశ్రయులవటం కలచివేస్తుంటే.. ఒక రోజు.. నా వన్ ఆన్ వన్ డిస్కషన్ లో ఆయన ఫామిలీ స్థిరపడిన ఫ్లారిడా లో ఒక మనిషి ఏదో రిపెయిర్ చేస్తుంటే.. పైన్నుంచి వర్షానికి చెట్టు కూలి బలయ్యాడట. చాలా బాధాకరమైన వార్త అని పదే పదే బాధపడుతుంటే.. ' ఆసియా లో లక్షలాది మంది.. ' ఇంకా వాక్యం పూర్తి చేసే లోపలే .. ఆయన చేయి ఊపుతూ.. 'ఏషియా ఈజ్ డిఫెరెంట్.. అక్కడ జనాభా ఎక్కువ.. మీ ఇండియన్లకి ఇలా ప్రకృతి ఉత్పాతాల్లో మరణాలు మంచిదేగా?' అన్నాడు.

' హెచ్ ఆర్ కి వెళ్ళనా? ' ఈ ముక్క మీద? అని గద్దించేసరికి.. 'నేనేమన్నాను? ఏమీ అనలేదు.. నువ్వు ఏదో ఊహించుకుంటున్నావు..' అని మాట మార్చాడు..

ఒకరోజు.. స్టాఫ్ మీటింగ్ అయ్యాక 20 మంది పైగానే ఉన్నారు.. ఆయన 'ఇండియానా జోన్స్ ' చూసాట్ట.. చర్చ మొదలు పెట్టాడు. నేను లేవబోతుంటే.. 'ప్రభా.. నువ్వేమో వెజిటేరియన్ అంటావు.. ఈ సినిమాలో వాళ్ళు చూడు కోతి మెదళ్ళు తింటారు.. ' అని వెక్కిరింపు గా అన్నాడు. అక్కడ అందరూ, విప్రో, హెచ్ సీ యెల్ లాంటి కాంట్రాక్టింగ్ కంపెనీలనుండి 3 నెలల వీసా మీద వచ్చిన వాళ్ళే.. ఎవ్వరూ ఏమీ అనలేదు .. రిస్కెందుకు అని..

నేను మాత్రం.. ఊర్కోలేదు.. 'యా.. డెట్ లెఫ్! బీ కేర్ ఫుల్ విత్ అజ్ ' అన్నాను. ఆయనకి ఒక క్షణం అర్థం కాలేదు... అయ్యాక 'వెయిట్ అ మినిట్.. డిడ్ యూ జస్ట్ కాల్ మీ మంకీ?' అని నా వెనక వచ్చాడు.

నేను వెనక్కి తిరిగి 'యౌ డోంట్ నీడ్ టు బి కన్సర్నెద్, వీ ఓన్లీ ఈట్ బ్రెయిన్స్.. అండ్ యూ డోంట్ సీం టు హావ్ వన్ ' అన్నాను.

అందరూ నా చుట్టూ మూగి.. అభినందించటం తో.. ఇంక మాట్లాడలేక వెళ్ళిపోయాడాయన.

అల్లరి శ్రేయ కబుర్లు..

మా కాలనీ లో ఒక పాప శ్రేయ..మరాఠీ పిల్ల.. దానికి మూడేళ్ళు.. అదంటే అందరికీ హడల్...

అదొక పెళ్ళి కెళ్ళింది.. భజంత్రీలు ఆపేసారు ఒక్కసారిగా..ఎవరో చెప్పారని.. సరిగ్గా అప్పుడే అది పంతులుగారి ట్రాన్స్పరెంట్ తెల్ల ధోవతి లోంచి ఎర్ర రంగు షార్ట్స్ గమనించి.. 'అమ్మా.. నేనూ, పంతులుగారూ మాచింగ్ లాగూలేసుకున్నాం ' అని అరిచింది.. పాపం ఆయన దెబ్బకి శాలువా చుట్టుకుని.. ఒక పట్టాన పీట మీదనించి లేవలేదు..


ఒకరోజు దానికి చాక్లేట్ తినాలనిపించింది. పక్కింటికెళ్ళి అడిగింది.. పెద్దవాళ్ళందరికీ వాళ్ళమ్మ ముందే చెప్పి ఉంచింది.. సొ ఆవిడ చెప్పేసింది నిర్మొహమాటంగా.. 'ఇవ్వను ' అని..

సరే.. ఇంకోళ్ళింటికెళ్ళింది.. తలుపు కొట్టింది.. వాళ్ళ పెద్ద పిల్ల దీప చదువుకుంటుంది. దానికి చిరాకు, వాళ్ళ చెల్లెలూ, ఇదీ హడావిడి చేస్తారని.. తలొక్కటే బయట పెట్టి అడిగింది.. 'ఏం కావాలి?' అని.

ఇది.. 'మధు తో ఆడుకోవచ్చా?'
దీప ... 'లేదు.. అది బయటకి రాదు..'

మళ్ళీ తలుపు కొట్టింది..

ఇది .. 'పోనీ నేను లోపలికి రావచ్చా? '
దీప ... 'లేదు, సారీ'

మళ్ళీ తలుపు కొట్టింది..

ఇది .. 'ఏదైనా చాక్లేట్ ఇస్తారా?'
దీప ... 'మా ఇంట్లో లేవు.. ఇంక మళ్ళీరాకు '

మళ్ళీ తలుపు..

ఇది నోరు తెరిచేలోపలే.. దీప అరిచింది 'నేను రావద్దని చెప్పానా? ఆడుకోవటానికి కుదరదు.. మా ఇంట్లో చాక్లేట్లు లేవు..'

ఇది .. 'ఒక చిన్న పాట పాడి వినిపించవచ్చా పోనీ?'
దీప కి ఏమనాలో అర్థం కాలేదు.. ' సరేలే..రా.. మా చెల్లితో ఆడుకో..కానీ.. ఏమీ శబ్దం చేయటానికి... '

వాక్యం కంప్లీట్ చేయనిస్తుందా? అది లోపలకెప్పుడో వెళ్ళిపోయింది.

మా ఇంటికొచ్చింది.. నేనేమో.. అప్పుడే మాంచి వర్షం గా ఉందని.. ఎర్రావకాయన్నం తింటున్నాను..

అది .. 'ఆంటీ.. నేనూ తినచ్చా?'
నేను .. 'లేదమ్మా.. కావాలంటే బిస్కట్ తిను..'
అది .. 'ఆంటీ.. మా అమ్మ చెప్పింది.. నీకెప్పుడైనా.. అన్నం తినాలనిపిస్తే.. ప్రభాంటీ దగ్గరకెళ్ళి అడుగు.. ఆవకాయ లాంటిది ఏమైనా వేయమని అడుగూ..

నేను.. 'నిజమా? అడుగుతానుండు.. ఫోనేది?'

ఇంకా అదెక్కడుంది? ఎప్పుడో తుర్రు..

మా ఎదురింటివాళ్ళింటికెళ్ళి చాక్లేట్ అడిగింది.. ఆవిడ 'లేవు ' అంది. ఇది ఒక్క మాట మాట్లాడకుండా వెనక్కి తిరిగింది.. ఆవిడ నొచ్చుకుని.. ఏంటీ అని అడిగితే.. చెప్పింది..

'ఇష్టం లేకపోతే.. ఇవ్వకండి.. కానీ..ఇలా అబద్ధం ఆడేవాళ్ళంటే నాకు చిరాకు '
ఆవిడ ముక్కున వేలేసుకుంది.

నిన్న వాళ్ళ నాన్న వెనకనుండి.. 'ఇప్పుడు బయటకెళ్తే..మళ్ళీ వెనక్కి రావు.. గుర్తుంచుకో!' అని వార్నింగ్. ఇది తలెగరేసి వెళ్ళిపోయింది.

రాత్రి 8 దాటింది అని..వాళ్ళ నాన్న, అన్ని ఫ్లాట్లు తిరుగుతూ.. వెతుకుతూంటే.. 'ఏం? ఏమయిపోయింది.. నీ పంతం? రానివ్వనన్నావ్ గా?' అంది..

ఇంకా మరిన్ని అల్లరి విశేషాలతో.. ఇంకో టపా లో..

క్లాస్ రూం బోర్డ్ మీద చిలిపి పద్యం..

మా కాలేజ్ లో సైన్స్ మాస్టారు గుండు చేయించుకుని వచ్చాక మేం రాసిన చిలిపి పద్యం..
నున్న నున్నగ నుండు, చూడచక్కగనుండు,
సారు వారి గుండు, మెరుపు మెండు,..

క్లాసు మస్తుగ నుండు, పరుగు పరుగున రండు,..
(కానీ)
తెచ్చుకొన దిండు, మరువకుండు..

ఛందస్సూ, భాషా.. అవీ సరిగ్గా చూడలేదు కానీ.. మా సార్ కి చాలా కోపం వచ్చి క్షమాపణల పర్వం అయ్యిందని.. వేరే చెప్పనక్కరలేదనుకుంటా.. :-)

మొదటి రిమార్కు..

మొదటి రిమార్కు..

నా బ్లాగ్ లో చుట్టూ జరిగే విషయాలమీద ఊర్కే చిన్న చిన్న అబ్జర్వేషన్లు.. వేద్దామని..

థాంక్సు,
-రాణి/